Explore
The Exeter Book
The Script
The Fonts
Specimens
Downloads
FAQ
Bibliography
Acknowledgements
The Husband’s Message
14 Dec 21
fols. 123r–123v
N2
u ic onsundran þe secgan wille
…… treocyn ic tudre aweox;
in mec æld… sceal ellor londes
settan …… sealte streamas
…sse. Ful oft ic on bates
gesohte
þær mec mondryhten min ……
ofer heah hofu; eom nu her cumen
on ceolþele, ⁊ nu cunnan scealt
hu þu ymb modlufan mines frean
on hyge hycge. Ic gehatan dear
þæt þu þær tirfæste treowe findest.
Hwæt, þec þonne biddan het se þisne beam agrof
þæt þu sinchroden sylf gemunde
on gewitlocan wordbeotunga,
þe git on ærdagum oft gespræcon,
þenden git moston on meoduburgum
eard weardigan, an lond bugan,
freondscype fremman. Hine fæhþo adraf
of sigeþeode; heht nu sylfa þe
lustum læran, þæt þu lagu drefde,
siþþan þu gehyrde on hliþes oran
galan geomorne geac on bearwe.
Ne læt þu þec siþþan siþes getwæfan,
lade gelettan lifgendne monn.
Ongin mere secan, mæwes eþel,
onsite sænacan, þæt þu suð heonan
ofer merelade monnan findest,
þær se þeoden is þin on wenum.
Ne mæg him worulde willa gelimpan
mara on gemyndum, þæs þe he me sægde,
þonne inc geunne alwaldend god
…… ætsomne siþþan motan
secgum ⁊ gesiþum s…
næglede beagas; he genoh hafað
fædan goldes
…d elþeode eþel healde,
fægre foldan
…ra hæleþa, þeah þe her min wine…
nyde gebæded, nacan ut aþrong,
⁊ on yþa geong …… sceolde
faran on flotweg, forðsiþes georn,
mengan merestreamas. Nu se mon hafað
wean oferwunnen; nis him wilna gad,
ne meara ne maðma ne meododreama,
ænges ofer eorþan eorlgestreona,
þeodnes dohtor, gif he þin beneah
ofer eald gebeot incer twega.
Gecyre ic ætsomne ᛋ ᚱ geador
ᛠ ᚹ ⁊ ᛞ aþe benemnan,
þæt he þa wære ⁊ þa winetreowe
be him lifgendum læstan wolde,
þe git on ærdagum oft gespræconn|
