Riddle 3

fols. 101v–102v

Hwilum mec min frea fæste genearwað,

sendeð þonne under salwonges

bearm þone bradan, ond on bid wriceð,

þrafað on þystrum þrymma sumne,

hæste on enge, þær me heord siteð

hruse on hrycge. Nah ic hwyrftweges

of þam aglace, ac ic eþelstol

hæleþa hrere; hornsalu wagiað,

wera wicstede, weallas beofiað,

steape ofer stiwitum. Stille þynceð

lyft ofer londe ond lagu swige,

oþþæt ic of enge up aþringe,

efne swa mec wisaþ se mec wræde on

æt frumsceafte furþum legde,

bende ond clomme, þæt ic onbugan ne mot

of þæs gewealde þe me wegas tæcneð.

Hwilum ic sceal ufan yþa wregan,

streamas styrgan ond to staþe þywan

flintgrægne flod. Famig winneð

wæg wið wealle, wonn ariseð

dun ofer dype; hyre deorc on last,

eare geblonden, oþer fereð,

þæt hy gemittað mearclonde neah

hea hlincas. þær bið hlud wudu,

brimgiesta breahtm, bidað stille

stealc stanhleoþu streamgewinnes,

hopgehnastes, þonne heah geþring

on cleofu crydeþ. þær bið ceole wen

sliþre sæcce, gif hine sæ byreð

on þa grimman tid, gæsta fulne,

þæt he scyle rice birofen weorþan,

feore bifohten fæmig ridan

yþa hrycgum. þær bið egsa sum

ældum geywed, þara þe ic hyran sceal

strong on stiðweg. Hwa gestilleð þæt?

Hwilum ic þurhræse, þæt me on bæce rideð

won wægfatu, wide toþringe

lagustreama full, hwilum læte eft

slupan tosomne. Se bið swega mæst,

breahtma ofer burgum, ond gebreca hludast,

þonne scearp cymeð sceo wiþ oþrum,

ecg wið ecge; earpan gesceafte

fus ofer folcum fyre swætað,

blacan lige, ond gebrecu ferað

deorc ofer dryhtum gedyne micle,

farað feohtende, feallan lætað

sweart sumsendu seaw of bosme,

wætan of wombe. Winnende fareð

atol eoredþreat, egsa astigeð,

micel modþrea monna cynne,

brogan on burgum, þonne blace scotiað

scriþende scin scearpum wæpnum.

Dol him ne ondrædeð ða deaðsperu,

swylteð hwæþre, gif him soð meotud

on geryhtu þurh regn ufan

of gestune læteð stræle fleogan,

farende flan. Fea þæt gedygað,

þara þe geræceð rynegiestes wæpen.

Ic þæs orleges or anstelle,

þonne gewite wolcengehnaste

þurh geþræc þringan þrimme micle

ofer byrnan bosm. Biersteð hlude

heah hloðgecrod; þonne hnige eft

under lyfte helm londe near,

ond me on hrycg hlade þæt ic habban sceal,

meahtum gemagnad mines frean.

Swa ic þrymful þeow þragum winne,

hwilum under eorþan, hwilum yþa sceal

hean underhnigan, hwilum holm ufan

streamas styrge, hwilum stige up,

wolcnfare wrege, wide fere

swift ond swiþfeorm. Saga hwæt ic hatte,

oþþe hwa mec rære, þonne ic restan ne mot,

oþþe hwa mec stæðþe, þonne ic stille beom|

Disclaimer: The Exeter Book Hand is an independent project with the aim of encouraging the study and appreciation of the Exeter MS 3501. The products and content on this site are not endorsed by the Exeter Cathedral or any other institution.